Manera anticipa for di algun luna pasa, Loutiza Raven tabatin un presentacion pendiente na Uruguay, cual, segun su mesun palabranan, tabata un experiencia diferente. Y awo Loutiza ta bek na Aruba y su fanaticonan no a faya den ricibie na aeropuerto na su yegada. El a conta nos cu el a yega hopi cansa. Uruguay ta basta ora leu di Aruba. Sinembargo e ta super contento, super emocional y gradicido na tur cu a mand’e tur e bon deseonan y el a bay super bon. Tabata un experiencia full diferente cu nunca el a experencia algo asina. E ta super contento con cos a bay.
Prensa presente
Segun Loutiza na Uruguay diferente prensa di diferente pais a entrevist’e. Nan a keda den shock y impacta. E ta super contento con cos a bay. Tabatin diferente cantante for di varios pais y Aruba tabata invita. Por a siña diferente cultura, diferente artista. Por a conoce otro artista, y hasta yoramento tabatin ora cu cada ken a bay nan respectivo pais. Loutiza a conta cu a topa cu diferente compositor y areglista di tur caminda. Tabata un experiencia inolvidabel.
Mas presentacion
Loutiza a indica cu lo bay tin hopi bon cos na caminda, cual ta loke a papia cu manager di Loutiza, esta Henry Oliviera. El a bin cu buki yen, segun Loutiza y e ta contento cu esey. A base di su presentacion nan a “fall in love cu Loutiza Raven.” E manager su man tabata yen yen, pero awo cu nan ta na Aruba, e preparacionnan ta continua.
Aceptacion na Uruguay
Segun Henry Oliviera, manager di Loutiza, nan no tin palabra pa describi e aceptacion ricibi na Uruguay. Nan no tin palabra mirando e acogida. Tur hende a duna elogio na Loutiza. No tabatin un hende cu por a papia algo robes di e presentacion di Loutiza. For di su trahe te na su cantamento. Por a mira tambe cu diferente pais a participa. Tabatin promotor fo’i Merca, promotor fo’i Peru, Uruguay, Spaña. Tur tabat’ey y tur a papia 300% bon di Loutiza.
E presentacion cu Loutiza a haci tabata “out of this world.”
Agenda ta yen
Pa loke ta e presentacionnan, Oliveira a indica cu agenda ta yen. Hopi preparacion pa afo. Despues di su presentacion, agenda a yena. No por papia di nada, pasobra awo ta bay traha riba e contractnan, e presentacionnan, e cantidad di festivalnan internacional cu lo bay tin.
Pa loke ta e EP, ta algo tremendo. E forma cu a lansa e EP y na entreg’e como un regalo, na Uruguay y Panama, tur hende a keda impacta con e forma cu a presenta su EP.
Por spera mas
Mirando e acogida cu Loutiza tabatin na Uruguay, ta cos bon so ta spera pa e cantante local aki cu sigur a laga un marca profundo durante su presentacion n’e pais aki. Nos ta keda pendiente pa cada desaroyo cu por tin, for di su presentacionnan, te na su lansamentonan. Exito, Loutiza.
